كنت طالع المكتب لقيت عمى رزق عامل السيراميك بيكلم
فى الموبايل .قلت ليه ايه ياعم رزق انت بتحب ولا ايه بص وقالى:
(كلنا بنحب) فكرت فى الكلمه وبصراحه عجبتنى
عجبتنى لأنها واقع بنعيشه .مافيش حد الا ولازم يكون بيحب
(ولولا الحب ماالتف الغصن على الغصن)
ومش شرط يكون حب واحد لواحده
الموضوع اكبر من كده بكتير يبدأ بحب ربنا وينتهى بحب النفس
بس طبعا معظم قصص الحب بتبقى بين واحد وواحده
وفى الحقيقه كان فى قصه حصلت لناس اصدقائى كنت حابب تعرفوها
واحنا طبعا مش بنحكى وخلاص احنا بنحكى عشان نتعلم
بنت من البنات كانت بتحب ولد بجد والولد اصغرمنها
بحوالى سنتين بس شكله اكبر منها
الولد محترم جدا وكمان البنت بس كان حب غلط طبعا
مش عشان هى اكبر منه لكن عشان هو طالب لسه بيدرس
عشان أمره مش فى إيده عشان أهله رافضين الموضوع تماما
وطبعا هددوه انه مش هايقعد فى الشقه انه مش هايكمل تعليمه
عشان كده كان حب مصيره الفشل وطبعا عشان الحب كان صادق
البنت كانت متأثره جدا لدرجة انها دخلت المستشفى
والولد الله أعلم بحاله وطبعا احنا ياما قاعدنا ننصح
وماحدش سمع كلامنا بس الحمد لله بدءت البنت تفكر صح
وتدوس على قلبها وتفكر بعقلها وعرفت ان الموضوع فاشل تماما
فقررت انها تتخطب واتخطبت بسرعه وسبحان الله اتخطبت لواحد
بيحبها بقاله سبع سنين يعنى ربنا كرمها بالانسان اللى بيحبها بجد
والاهم انه دخل البيت من بابه والحمد لله نوعا ما البنت بتنسى
الماضى وقسوته وبتتفائل بالحاضر وحلاوته
وتمت الخطوبه السعيده وانا من هنا من مدونتى بتمنى ليهم
التوفيق ودوام المحبه والالفه ويارب يجعل ايامهم كلها هنا
دى كانت قصه من قصص الحب
ياترى ممكن نحب وننجرح وبعدين نحب تانى
ياترى ممكن ننخدع ونتظلم ونحن تانى
ياترى ممكن نساعد الشخص اللى بنحبه ونرجعله تانى
ياترى ممكمن الحب يقتل صاحبه او يسعده
ياترى ممكن الحب يكون فعلا حب
فى قصص كتير حب تخليك تحب الحب وقصص تخليك تكره الحب
بس الاكيد كل الاكيد ان (كلنا بنحب)
اخيرا أقول :
مالحب الا كلمة****** أولها حياة وآخرها بكاء
فاخذى الحياة واهنئى بيها
واحذرى البكاء فإنه فى الطريق جليسا
ليست هناك تعليقات:
إرسال تعليق